Entrepreneur-ის სტატია ჩვენს შესახებ
გვანცა ნიკოლეიშვილი მარკეტინგის სფეროში 16 წლიდან მუშაობს. ერთ დღესაც გადაწყვიტა, სამსახური დაეტოვებინა და მრავალწლიანი გამოცდილებით ახალი კარიერული ეტაპი დაეწყო – საკუთარი ციფრული მარკეტინგული სააგენტო დაეარსებინა. ასე დაიწყო “ერინიების” ისტორია, რომლის გუნდი დაფუძნებიდან 6 თვეში უკვე ნახევარმილიონიან პროექტზე მუშაობდა. დღეს “ერინიების” კლიენტებს შორის სხვადასხვა ინდუსტრიის არაერთი ლიდერი კომპანიაა, თავად სააგენტო კი სოციალური მედიის მართვის უნიკალური მიდგომით გამოირჩევა.
“ერინიები” არის ციფრული მარკეტინგული სააგენტო, რომლის ძირითადი კონცეფციაა სოციალური მედიის ადმინისტრირება ყველა პლატფორმაზე. ეს არ ეხება მხოლოდ ინსტაგრამს, ფეისბუქს, ტიკტოკს და სხვა პოპულარულ სოციალურ ქსელებს – “ერინიების” მომსახურება ასევე ვრცელდება იმ დარგობრივ პლატფორმებზეც, რომელთა დაჯავშნის სისტემითაც, მაგალითად, სასტუმროები სარგებლობენ. სააგენტო ასევე გამოირჩევა მაღალი ხარისხის კონტენტით – “ერინიები” დამკვეთებს უმაღლესი სტანდარტების ფოტო და ვიდეოგადაღებასაც სთავაზობენ.
“ერინიების” კონცეფციაზე,ბიზნესის მართვას თავისებურებებსა და ქალი ანტრეპრენერების გამოწვევებზე გვანცა ნიკოლეიშვილი გვესაუბრება:
“მარკეტინგის სფეროში ყველა პოზიციაზე მაქვს მუშაობის გამოცდილება – დაწყებული გაყიდვებით, დამთავრებული სააგენტოს დამფუძნებლით. “ერინიების” შექმნამდე ერთ-ერთი სარეკლამო სააგენტოს თანამშრომელი ვიყავი. ისე მოხდა, რომ ჩემს გუნდში ქალი მხოლოდ მე აღმოვჩნდი. იმ ასაკში ძალიან ბევრი კრეატიული იდეა და უშრეტი ენერგია მქონდა, მაგრამ ხშირად მიჭირდა კაცების გარემოცვაში ჩემი იდეების ბოლომდე გატანა. ვგრძნობდი, რომ ჩემი იდეების მიმართ სათანადო მიმღებლობა არ იყო. მახსოვს, ერთ დღეს შეხვედრაზე მითხრეს – “ეგ იდეა არ იმუშავებს, კაცებმა უფრო ვიცით, რა იმუშავებს”. მივხვდი, რომ ასეთ გარემოში ვერ გავაგრძელებდი მუშაობას და სამსახურიდან წამოვედი. ამ დროისთვის ინდუსტრიას უკვე სრულყოფილად ვიცნობდი. ვიცოდი, რა სჭირდებოდა სფეროს, რა ნაკლოვანებები არსებობდა და რა მოთხოვნებს ვერ აკმაყოფილებდნენ სააგენტოები. ვიცოდი, რომ აუცილებელი იყო კლიენტთან ინდივიდუალური მიდგომა, რისი დანაკლისიც ბაზარზე ნამდვილად იყო. ამ გამოცდილებით და ახლის შექმნის იდეით ჩემი სააგენტო დავაფუძნე”.
გვანცა მიიჩნევს, რომ პროფესიული გამოცდილება არა მხოლოდ საკუთარი ბიზნესის განვითარების, არამედ ძლიერი გუნდის ჩამოყალიბების მთავარი საფუძველია. მისი აზრით, ლიდერი, რომელსაც ინდუსტრიაში სხვადასხვა პოზიციაზე უმუშავია, თანამშრომლების საჭიროებებს უკეთ იგებს და უფრო ეფექტიანადაც ურთიერთობს.
“როდესაც რაღაც იდეაზე ვმუშაობთ, ჩემს თანამშრომლებს ვეუბნები: “თქვით ყველა გიჟური იდეა, რაც თავში მოგივათ და შემდეგ მათგან საუკეთესოს ამოვარჩევთ”. ჩვენს კომპანიაში მენეჯერული მიდგომა თავისუფლებაზეა დაფუძნებული – აქ ყველამ იცის, რომ შეუძლია თამამად გააჟღეროს ინიციატივა და საკუთარი იდეა. “ერინიებში” ვაფასებთ თითოეული ადამიანის ინდივიდუალურ შემოქმედებით ხედვას.
Entrepreneur-თან საუბრისას გვანცა იხსენებს, რომ “ერინიების” დაარსებიდან სულ რაღაც ერთ წელიწადში სააგენტომ უდიდეს წარმატებას მიაღწია და ნახევარმილიონიან პროექტზე დაიწყო მუშაობა, რაც საქართველოს ბაზრისთვის განსაკუთრებული მიღწევაა. თუმცა წარმატების ყველაზე მნიშვნელოვან მომენტში ის პირადი გამოწვევების წინაშე აღმოჩნდა: ორსულობამ და დედობის ახალმა ეტაპმა დროებით აქტიურ სამუშაო რეჟიმს ჩამოაშორა, რამაც ბიზნესზეც იმოქმედა. როგორც თავად ამბობს, ციფრული მარკეტინგის სფეროში პაუზა დიდი ფუფუნებაა, რადგან კონკურენცია უკიდურესად მაღალია და ეს პაუზა ხშირად ყველაფრის თავიდან დაწყებას ნიშნავს.
“როდესაც ბავშვის გაჩენიდან დაახლოებით 6 თვეში სრული მოცულობით დავუბრუნდი სამუშაო რეჟიმს, ლამის ყველაფერი თავიდან დავიწყე და კვლავ უწინდელ წარმატებას მივაღწიეთ. თუმცა შემდეგ მეორე ბავშვი გავაჩინე და ისევ იმავე გამოწვევების წინაშე დადგა ჩვენი სააგენტო. ახლა იმ ეტაპზე ვარ, როდესაც სტარტს მესამედ ვიღებ. ბიზნესისა და დედობის შეთავსება რთულია. ეს ყველა ანტრეპრენერმა ქალმა უნდა იცოდეს და წინასწარ იყოს მზად, რომ შესაძლოა დიდი წარმატებების შემდეგ დადგეს დაღმასვლა. თუ საქმის გაგრძელებას გადაწყვეტს, მან თავიდან უნდა გაიაროს რთული გზა. ყველაფრის თავიდან დაწყებისას ჩემი მთავარი მამოტივირებელი ძალა სააგენტოს პოტენციალია. მე ვიცი, რა მასშტაბის პროექტებზე და როგორი პროფესიონალიზმით უმუშავია “ერინიებს” და, შესაბამისად, ვიცი, რა შეგვიძლია. ძალიან კარგად ვხედავ “ერინიების” უნიკალურობას: ჩვენი გუნდი, კონცეფცია, პორტფოლიო, გამოცდილება, განვითარების ტემპი – ეს ყველაფერი მარწმუნებს, რომ წინ კიდევ უამრავი წარმატებაა და ამ შესაძლებლობების ფუჭად დაკარგვა არ შეიძლება”.
“ერინიების” კლიენტებს შორის სხვადასხვა ინდუსტრიის ცნობილი კომპანიები არიან. როგორც გვანცა ნიკოლეიშვილი ამბობს, კლიენტები ამბობდნენ, რომ სააგენტოს გუნდი ნებისმიერ დავალებას ისეთი პასუხისმგებლობითა და შემართებით უდგება, თითქოს ბიზნესის მფლობელები იყვნენ. სწორედ ეს მიდგომა განსაზღვრავს “ერინიების” უნიკალურ ნიშასაც და იწვევს დამკვეთების დიდ ნდობას, რაც ხანგრძლივ თანამშრომლობაში აისახება.
გვანცა მიიჩნევს, რომ მეწარმე ის ადამიანია, ვინც ბაზრის საჭიროებებს სწორად ამჩნევს და დაუყოვნებლივ იწყებს მოქმედებას – სწორედ ეს განაპირობებს წარმატებას. თუმცა, როდესაც საქმე ქალ ანტრეპრენერებს ეხება, რეალობა გაცილებით რთულია, რადგან მათ ხშირად უფრო მეტი ბარიერის გადალახვა უწევთ, ვიდრე კაცებს.
“უნდა ითქვას, რომ ნებისმიერი საქმე ბევრად გართულებულია ქალისთვის, ვიდრე კაცისთვის. სამწუხარო რეალობაა, მაგრამ ასეა. ქალს უწევს თავისი სიძლიერის დამტკიცება გარშემო მყოფებისთვის – საზოგადოებისთვის, პარტნიორებისთვის, თანამშრომლებისთვის, კლიენტებისთვის და ასე შემდეგ”, –ამბობს გვანცა ნიკოლეიშვილი.
კითხვაზე, თუ რა რჩევას მისცემდა სხვა ანტრეპრენერ ქალებს, გვანცა ნიკოლეიშვილი გვპასუხობს, რომ ეს განსაკუთრებით საპასუხისმგებლო საქმეა. მისი თქმით, ხშირად რჩევა ლამაზ, მაგრამ უშინაარსო სიტყვების ერთობლიობად იქცევა. სინამდვილეში კი ყველა შემთხვევა ინდივიდუალურია.
გვანცა ნიკოლეიშვილი:
“ალბათ წარმატების ერთ-ერთი მთავარი განმსაზღვრელი ფაქტორი საკუთარ თავთან, საკუთარ გონებასთან ჰარმონიაში ყოფნაა. ნებისყოფა, მყარი ფსიქიკა, რაციონალურობა და საკუთარ ტვინთან სწორი ურთიერთობის დაწყება ბევრ რამეს ხდის ნათელს და წარმატებასაც განსაზღვრავს”.
